மண் புழு வாழ்க்கை

மண் புழு வாழ்க்கை

கொடி பிடித்து கோஷம் போட்டு

தெரு இறங்கி போராடியதில்லை;

சின்னப் பெண்ணிடம் சில்மிஷம் செய்யும்

ஈனப்புத்திகாரனின் சட்டை பிடித்ததில்லை;

தூங்கிக் கொண்டிருக்கும் நாயைக் கல்

கொண்டு எழுப்பும் சிறார்களைக்   கடிந்ததில்லை;

மயங்கிய முதியவரை சுற்றிக் கூடியக் கூட்டத்தை

விலக்கி முதலுதவி செய்ததில்லை; 

 சினையை வயிறு நிறைந்து வரும்

பூனைக்கு ஒரு வேளை பால் வைத்ததில்லை;

கண் சிவந்து முகம் வீங்கி அழுதபடி வேலைக்கு வரும்

கண்ணம்மாவிடம் காரணம் கேட்டதில்லை;

எதையும் செய்யாமல் எதுவும் கேட்காமல்

எப்படியோ போகிறது

முதுகெலும்பில்லாத என்

மண் புழு வாழ்க்கை!