முகமூடிகளின் புலம்பல்கள்

 எத்தனை முறை மாற்றுவாய்

ஒருநாளைக்கு

எத்தனை முறை மாற்றுவாய்

முகமறந்து போகுமளவு

சொந்த முகமறந்து போகுமளவு

எத்தனை முறை மாற்றுவாய்

 

எங்களுக்கே சலித்து விட்டது..

முகமூடிகள் நாங்கள்

எங்களுக்கே சலித்து விட்டது.

உன்னில் எதனை மறைக்க

எங்களை மாற்றிக் கொண்டேயிருக்கிறாய்?

 

நீ அணிந்து வீசிய நாங்கள்

மண்மூடாமலும்

கண் மூடாமலும்

வீதி முழுதும்.

 

எல்லாம் சரி...

வீசப்பட்ட நாங்கள்

மீண்டும் தேவைப்படின்

எப்படி கண்டுபிடிப்பாய்?

இந்த பொய்முகத்திற்கு

இந்த முகமூடிதான் என்று..

 

ஒன்று சொல்கிறேன் கேள்.

வீசப்பட்ட நாங்கள்

வீசப்பட்டவையாகவே

இருந்து கொள்கிறோம்.

இனியாவது

உன் உண்மை முகங்காட்டு.

 

எங்களுக்காக இல்லை..

உனக்காக..

முகமூடியின்றி

மூச்சு விட்டுப்பார் - இனி

ஒருபோதும் தொடமாட்டாய்

எங்களை..

நாங்களும் இனி சுதந்திரமாய்!!!